నిరసన

పతకాలకు మరీ యింత భారీ నజరానాలా?


ఇటీవల తెలంగాణా సి.ఎమ్. గారు సానియా మీర్జాను తమ బ్రాండ్ (ఇదేమిటో కొత్త మార్కు) అంబాసిడర్ గా టెన్నిస్ క్రీడాకారిణి సానియా మీర్జాను ప్రకటిస్తూ కోటి రూపాయలు తన శిక్షణ కోసం ప్రకటించారు. అలాగే ఇటీవల ముగిసిన యూ.ఎస్. ఓపెన్ చాంపియన్షిప్ లో పెద్దగా పేరులేని మిక్స్ డ్ డబుల్ టైటిల్ సాధించిందని మరో కోటి రూపాయలు ప్రకటించారు. ప్రజల సొమ్మును మంచినీళ్ళ ప్రాయంగా (ఇదీ ఇప్పుడు ప్రియమైపోయింది) తమ బాబు జేబులో కన్నమేసి ఇచ్చినట్టుగా ఇచ్చేస్తున్నారు. తాను తెలంగాణాను ఏలిన నైజామ్ వారసుడుగా అనుకుంటున్నారా సార్ వాడు. అసలు వ్యక్తిగత క్రీడాకారులకు అసలు ఈ క్రీడలకు ఇంతింత సొమ్ము దొబ్బ పెట్టడం అవసరమా? దానివలన ఏమైనా ఉత్పత్తి జరిగి నలుగురికి తిండి పెట్టేదుందా? నిజానికి మన గ్రామీణ క్రీడాకారులకు అసలు ఇటువంటి అవకాశాలు వస్తున్నాయా? ఎంతో మంది వాలీబాల్, కబడ్డీ మొ.న ఆటగాళ్ళు తమ వ్యక్తిగత ప్రతిభతో పతకాలు సాధించాక చదువుతో పాటు మెరిట్ సర్టిఫికేట్ చూపి ఉద్యోగాలలో వాటా పొందుతారు. లేని వాళ్ళు ఏ హోటళ్ళలోనో సర్వర్ లుగా బతుకీడ్చే వాళ్ళే ఎక్కువ. అసలు పాఠశాల స్థాయిలో వ్యాయామ అంశాలకు ఏమాత్రం ప్రాధాన్యం యిస్తున్నాం. వ్యక్తిగత ఆరోగ్యానికి సంబంధించినంతవరకు వీటిని ప్రోత్సహిస్తే సరిపోతుంది. అంతే కానీ యిలా ఖరీదైన స్థలాలు డబ్బు ప్రజల కష్టార్జితాన్ని అప్పనంగా ధారపోస్తుంటే అంతా నోరెళ్ళబెట్టి చూడడమే తప్ప ఎవరూ వాటిని ఖండించడం లేదు. దానివలన వచ్చే కీర్తి ఎవరి భుజాలకు చేరుతుంది. వీళ్ళకి రక రకాల పేర్లతో బిరుదులు ఈ మద్య భారత రత్నలు ఇస్తున్నారు. ఇదంతా అనవసర ఆర్భాటం. క్రీడలు వ్యక్తిగత దారుఢ్యానికి తప్ప వాటి వలన ఒరిగేదేమీ వుండదు. ప్రజల ఉత్పత్తి సామర్థాన్ని దెబ్బతీసే క్రికెట్ ప్రసారాలు నిషేధించాల్సిన అవసరమెంతైనా వుంది. ఇలా చెప్పుకుంటూ పోతే ఇంకా చాలా కానీ ఈ సానియా మానియా మన నాయకుడికి ఎందుకో యింతన్నది ఆ పెరుమాళ్ళకే ఎరుక…

ప్రకటనలు

భర్తల కోసం భార్యల ఆక్రోశం..



ఏ కారడవిలో వున్నాడో, ఎప్పుడొస్తాడో, ఎలా వస్తాడో, బతికి వస్తే సంతోషం లేకపోతే నుదుట కుంకుమ చెరిగిపోయి తను పిల్లలు అనాథలయి బతకాలని, ప్రతి క్షణం తన కోసం కల కంటూ బతక లేక, చేస్తున్న ఉద్యోగం ఎవరికోసమో అర్థం కాక, తను ఏం తిన్నాడో ఎలా వున్నాడో తెలీని అగమ్యగోచరంలో ఓ భయానక వాతావరణంలో ఒంటరితనం భరించలేక గత మూడు రోజులుగా రోడ్లపై కొచ్చి తామూ మనుషులమేనని గుర్తించాలని పిల్లా పాపలతో ఓ ఆడ మంత్రి వున్న శాఖలోని మహిళలంతా ఆక్రోశిస్తే అదే శాఖలోని మరో సుఖం మరిగిన దున్నలు వెటకారం చేస్తే చెప్పే ఆయుధంగా తిరగబడి పిల్లినైనా గదిలో బంధిస్తే ఏం చేస్తుందో చేసి చూపారు స్పెషల్ పోలీసు బెటాలియన్ సాయుధ పోలీసుల భార్యలు…

వారి ఆవేదన వెనక దాగి వున్న ఎన్నో కఠోర సత్యాలు నేటికి మీడియా ముందుకొచ్చి అందరికీ తెలిసాయి. నిజానికి యిలా తమ దోపిడీ పాలనకు వత్తాసుగా తమకు రక్షణగా పనిచేస్తున్న వారి పట్ల యింత నిర్దయగా వ్యవహరించే ప్రభుత్వం వారి పై అధికారులకు యివన్నీ తెలియనివా? బ్రిటిష్ కాలం నాటి ఆర్డర్లీ వ్యవస్థను ఈనాటి ప్రజాస్వామ్యమని చెప్పుకొనే పాలనలో కూడా అమలు చేస్తూ కింది స్థాయి పోలీసును బానిసగా చూస్తూ దొర పెత్తనం చెలాయించే వీళ్ళకు నడి బజారులో కాలర్ పట్టుకోవద్దా. వారికి లేని హక్కును వారి భార్యలు చేసి చూపారు. ఇదే విధంగా ఆ పోలీసులే స్వయంగా చేసి వుంటే వారిపై క్రమశిక్షణా చర్యలంటూ భయపెట్టే వారు. అలాగే ఇక్కడ మరో విషయం ఇన్ని లక్షల మంది పోలీసులలో చాలా వరకు ఎస్.ఐ.కంటే దిగివ స్థాయి సిబ్బందంతా దిగువ మధ్య తరగతి, బీద కుటుంబాలనుంచి వచ్చినవారే. ఈ ఉద్యోగమూ లేకపోతే బతకలేమని చేస్తున్న వారే. ఈ విషయమెరిగిన పాలకులు వీరిపట్ల ఇంత నిర్దయగా వ్యవహరిస్తున్నారు.

కావున వీరి డిమాండ్లన్నీ సహేతుకమైనవి కాబట్టి వీరిని మనుషులుగా సంసారులుగా గుర్తిస్తూ అంగీకరించేందుకు పాలక వర్గంపై అన్ని వర్గాల ప్రజలు వత్తిడి తేవాల్సిన అవసరముంది.

పోగాలం దగ్గరబడిందిరా…(పెట్రో ధరలకు నిరసనగా)


ఈళ్ళ సేతులల్ల బెమ్మెజెముడు మొలిసియ్య
ఈళ్ళ బుఱలో పాములు పెరుగుతున్నాయా
జెనాలు ఎలా బతుకీడుస్తున్నారో
ఎలా గోసబెడుతున్నారో
ఏ ఒక్కడికైనా యాదిలో వుందా..
ఈళ్ళ జీతాల్ గీతాల్ పెంచుకు పోతూ
పేదోడి పొట్ట గొట్ట సూస్తున్నారు కదయ్యా…

ఎక్కడా ఎండు కఱ పుల్లైనా దొరక్క
ఎలుగు గ్రూపుల్లో జేరి గొనుక్కున్న
గాస్ పొయ్యి యింక మా నెత్తిన బెట్టుకూరేగాలా?
ఆ ముద్ద వొండుకు తిండానికి కూడా
ఈలు లేకుండా యింత బరువు నెత్తితే
మీ నెత్తిన ఈ బండతో మోదాలిరా…

మీరిచ్చే మూడు గంటల పాటి కరెంటు కూడా ఎలగక
బుడ్డి దీపం ఎలిగించుకుందామన్నా
నువ్విచ్చే రేషన్ దుకాణంలోని
ఆ అర లీటరు కిరోసిన్ నీ కాష్టంలో పోద్దామంతే
మరల పెంచి జచ్చినావు కదరా?

ఈ జేత్తో కూల్డబ్బులిచ్చి
ఆ జేత్తో కొల్లగొట్టేస్తే మేమింక
ఏం దిని బతకాల?
ఏం దిని జావాల?

అటు యిత్తనాలు దొరక్క
ఎరువులు దొరక్క నారు పొయ్యనేక
ఒకైపు ఏడుస్తుంటే
ఈ అర్థరాత్రి ఈ సావు కబురొకటి…
మీ యింట్లో పీనుగెల్ల… 

మీకు పోగాలం దగ్గర పడుతోందిరా..

నందులు రాజకీయ ..ందులకా?


2009 రాష్ట్ర ప్రభుత్వ నంది అవార్డులలో ఉత్తమ నటుడు అవార్డు మాజీ ఎం.పీ. నటుడు దాసరి నారాయణ రావుకు దక్కడంలో రాజకీయ కోణం వుందన్నది స్పష్టం. ఆయన ఎలక్షన్ ముందు నటించిన మేస్త్రీ సినిమాలోని నటనకు దక్కడం వెనక ఆయన లాబీయింగ్ తో పాటు ఆ సినిమాను ప్రజారాజ్యం పార్టీని, చిరంజీవిని ఎదుర్కొనేందుకు తీసినందుకు దక్కిన ప్రతిఫలంగా భావించాల్సి వస్తోంది. అందులో ఏమి విరగదీసాడని ఈ అవార్డ్ నిచ్చారో జ్యూరీ వారు వివరించగలరా?

ఈ విధంగా ఓ సీనియర్ నటుడై వుండి ఇలా చేయడం ఆయన పట్ల వున్న కాస్తా గౌరవం మంటగలిసినట్లే.. అలాగే నంది అవార్డులుపై గత కొంతకాలంగా వున్న విమర్శలు సత్యదూరం కావని నిరూపిస్తున్న జ్యూరీని అభినందించాల్సిందే!!!

సోంపేట దారిలో..


వడ్డితాండ్ర వద్ద ధర్నాచేస్తున్న వేదిక


బీలమధ్యలో నిర్మాణమవుతున్న ప్లాంటు




సైబీరియా పక్శుల విహారకేంద్రం ముఖద్వారం


ఈ రోజు సంతబొమ్మాలి మండలం కాకరాపల్లి ప్రాంతంలో నిర్మాణమవుతున్న థర్మల్ పవర్ ప్రోజెక్టు ప్రాంతాన్ని పరిశీలించడానికి తోటి ప్రజా సంఘాలతో కలిసి వెళ్ళాం. ఆ ప్రాంతానికి దగ్గర గత పదిహేను దినాలుగా మత్స్యకార కుటుంబాలు ధర్నా చేస్తున్నాయి. వారిని భయపెట్టజూడడానికి పోలీసు వాహనాలు అలా తిరుగాడుతూనే వున్నాయి. వచ్చి ఫోటోలు తీయడం, వారికి ఏదో ఒక మాట విసురుతూ వారిని రెచ్చగొట్టజూస్తున్నారు. ఇదంతా ఒక ఎత్తు ఇప్పటికి ఈ వేసవిలో రెండు వందల ట్రాక్టర్ల ద్వారా రోజుల తరబడి ఆ చుట్టుపక్కల చెరువులనుండి, ఎత్తు పొలాలనుండి పెరిగిన మన్నుతో ప్రోజెక్టు చుట్టు పోసిన గట్టు వలన బీల నుండి సముద్రంలోకి చేరాల్సిన నీరు ఆ చుట్టుపక్కల వందల ఎకరాల ప్రాంతాన్ని, పంట పొలాలను ముంచి వేసింది. ఇప్పుడున్న గట్టు సుమారు ఐదారు అడుగులకే ఇలా అయితే తరువాత్తరువాత ఏమి జరుగుతుందోనని చుట్టూ వున్న గ్రామాల ప్రజలు ఆందోళన వ్యక్తం చేస్తున్నారు. తమ పొలాలను మాయ మాటలతో అమ్మివేయించిన రాజకీయ దళారులు ఇప్పుడు తప్పుకు తిరుగుతున్నారని, తమ భవిష్యత్ ఏమవుతుందోనని తీవ్ర భయానికి గురవుతున్నారు. అసలు బీల ప్రాంతాన్ని పోరంబోకుగా, మెట్టు ప్రాంతంగా రెవెన్యూ అధికారులు ఎలా రిపోర్టునిచ్చారో ఆశ్చర్యానికి గురిచేస్తుందెవరికైనా. ప్రస్తుతం ప్రాజెక్టు పనులు నెమ్మదిగా నడుస్తున్నాయి. తమ డిమాండును అంగీకరించి నిలిపివేయక పోతే మాదీ సోంపేట దారి కాకతప్పదని ప్రజలు ముక్తకంఠంతో చెప్తున్నారు. ఈ ప్రాంతానికి అతి దగ్గర్లో వున్న సైబీరియా పక్షుల విహార కేంద్రం కనుమరుగుకాక తప్పదు. బీలలో దొరికే చేపలాహారంగ జీవిస్తాయి ఈ పక్షులు. బీలను బొగ్గు బీడుగా మార్చి అటు పంటపొలాలకు నీరందక, మత్స్య సంపద నాశనంకావడం, చుట్టుపక్కల ప్రాంతం ఎడారిగా మారితే ఈ ప్రజలకు దిక్కెవరు? ఈ వినాశకర అభివృద్ధి ఎవరికోసం?ప్రజల పట్ల ఇంత నిర్దయగా పాలకవర్గం వ్యవహరించడాన్ని అడ్డుకొనేందుకు పర్యావరణవాదులు, ప్రజాస్వామ్య మేధావి వర్గం కదలిరావాల్సిన అవసరం ఎంతైనా వుంది.
మొత్తం ఫోటోలను ఈ లింక్ లో చూడొచ్చు..

Thermal Power Projects planted places

శిలకోల చూపు



వాకపల్లీ వాకపల్లీ
అప్పుడే నీ శోకానికి మూడేళ్ళూ నిండాయా?

అంతా మరిచిపోయారు..
ఎవరికి కావాలిలే నీ బతుకు
ఎవరికి వారు తమ రోజువారీ
పనులలో పడి తమ నిన్నటి గురించే
మరిచిపోయే కాలమిది..

సిగ్గువిడిచి నీకు జరిగిన అన్యాయాన్ని
ఆక్రోశిస్తే నవ్వుకున్న వారెందరో వున్న
ఈ పాడులోకం…

పచ్చని ఆకులమధ్య నీ శీలాన్ని హరించిన
ఖాకీచకులంతా పతకాలతోనో
అదనపు భత్యాలతోనో అలరారుతున్నారు..

వాడియైన నీ ‘శిలకోల’ చూపులకు
సమాధానం చెప్పే వాడే లేడిక్కడ..

కళ్ళకు నల్లటి గంతలతో ఊగే త్రాసు
పట్టుకున్న న్యాయదేవత
నోటికి కూడా నోట్ల తాళమో
ప్రమోషన్ల తాయిలమో వేసి నొక్కివేశారు కాదా?

మీడియాకు కొత్త కొత్త కథనాలే కావాలి
నీ పాతబడ్డ బట్ట చిరుగు ఎవరికి కావాలిలే నేస్తం..

అయినా..
నీ చేతిలో మెరిసే కొడవలే నీకు
అండకావాలి…

నీ అడుగులో అడుగువేసి
గొడ్డలికి పదును పెడుతున్న నీ
వారసత్వం బదులు కోరుతోంది..

(శిలకోల=బాణం మొన)
(తమపై అత్యాచారం జరిగిందని వాకపల్లి ఆదివాసీ మహిళలు న్యాయం కోరి మూడేళ్ళు నిండినా వారికి సమాధానం చెప్పలేని న్యాయానికి నిరసనగా)

ఉద్యమాల వనంరా…


అదిగదిగో ఉద్దానం..

ఉద్దానం కాదురా

ఉద్యమాల వనంరా…

ఈ పాట ఇంకా సజీవంగానే వుంది. సోంపేట ఉద్దానంలో భాగమే. మొన్నటి వరకు పాలకుల గుండెల్లో రైళ్ళు పరుగెత్తించిన పోరాటాల పురిటిగడ్డ. జమీందారీ పాలకులను ఎదిరించి పోరాడిన పోరుగడ్డ. ఉద్యమం వారికి ఉగ్గుపాలతో పెట్టిన విద్య. ఉప్పెనకు ఎదురొడ్డే గుండె ధైర్యం కలవారు.

కోస్టల్ కారిడార్ పేరిట నెల్లూరు నుండి ఇచ్చాపురం వరకు వున్న 1000 కి.మీ. తీర ప్రాంతాన్ని ప్రైవేటు పెట్టుబడిదారులకు అప్పనంగా దానం చేయబూనిన పాలకులు ఇక్కడి ప్రజల అభిప్రాయాలను గౌరవించాల్సిన కనీస ప్రజాస్వామిక దృక్పధాన్ని విస్మరించారు. ఒకే ప్రాంతంలో ఉత్తరాంధ్రలో 10 వరకు థర్మల్ ప్లాంటులు అవి కూడా వ్యాపార నిమిత్తం నిర్మించబూనడం, అలాగే రణస్థలం దగ్గర అణు విద్యుత్ ప్లాంటు నిర్మాణం చేబూనడం ఎంతవరకు సమంజసం?

ఉత్తరాంధ్ర ప్రజలు అంబలి గాళ్ళు, వారేమి చేస్తారులే, వారి నాయకులు మన కాలికింద చెప్పులై వున్నారు కదా అన్న ఫాసిస్టు ఆలోచనతో తప్పుడు అవగాహనతో ఈ ప్రాంత వినాశనానికి పూనుకున్నారు. బీల ప్రాంతమంతా సారవంతమైన భూములతో, నీటి వనరులతో, కొబ్బరి చెట్లతో గోదావరి తీర ప్రాంతాన్ని తలపించే వ్యవసాయ భూములతో పచ్చగా కళ కళలాడే ప్రాంతం. అలాగే తీరప్రాంతం అంతా మత్స్య సంపదతో నిండి వేలాది మంది మత్స్యకార కుటుంబాలు ఆధారపడిన జీవగడ్డ. అటువంటి ప్రాణాధారమైన ప్రాంతంపై ప్రజల అమాయకత్వాన్ని సొమ్ముచేసుకుందామన్న కుటిల ఆలోచనతో ఈ ప్రాంతాన్ని కబళించ చూడడం మూర్ఖత్వం.

ఉద్దానం ప్రాంత ప్రజలు ఎంత సాధారణంగా సౌమ్యంగా జీవనం సాగిస్తారో, తెగిస్తే ఉవ్వెత్తున ఉప్పెనలా విరుచుకుపడగలరని ఇక్కడి చరిత్ర తెలిసిన వారికి అవగతమౌతుంది. కొన్ని నెలలుగా ఈ ప్లాంట్ల నిర్మాణాన్ని వ్యతిరేకిస్తూ స్వచ్చందంగా ఏ రాజకీయ పార్టీ నేతృత్వంలో లేకుండానే గాంధేయ మార్గంలో తమ వ్యతిరేకతను తెలియజేస్తూ నిరవధిక నిరాహార దీక్షలు చేస్తున్నారు. తమ ఉనికికి ముప్పు వస్తుందని గ్రహించిన కొన్ని రాజకీయ పార్టీల నేతలు వారికి మద్ధతుగా మాటాడారు.

ఇటీవలే నర్మదా బచావో ఆందోళన్ నాయకురాలు, ప్రముహ పర్యావరణ వేత్త మేధాపాట్కర్ కూడా సందర్శించి వీరి ఆందోళనకు మద్ధతు పలికి, ప్రాజెక్టుల నిర్మాణం వలన ఈ ప్రాంతం ఎడారిగా మారిపోతుందని, లక్షలాది ప్రజలు నిర్వాసితులౌతారని, కావున వీటిని ఉపసంహరించుకోవాలని విజ్నప్తి చేసారు.

దీంతో ప్రభుత్వం ప్రైవేటు కంపెనీలకు మద్ధతుగా వేలాది పోలీసు బలగాలను తరలించి అక్కడ నిరాహార దీక్షా శిబిరాలను తొలగించే ప్రయత్నం చేసింది. అలాగే నిన్నటికి నాగార్జున కన్స్ట్రక్షన్స్ వారు చేపట్టిన నిర్మాణకార్యక్రమాన్ని అడ్డుకునేందుకు వచ్చిన నిరాయుధులైన ప్రజలపై కంపెనీ ప్రైవేటు గూండాలతో పాటు 3000 మంది సాయుధ పోలీసులను వారిపైకి ఉసిగొల్పి నలుగురు మత్స్యకారుల ప్రాణాలు తీసారు.

అలాగే ఇక్కడి ఉద్యమానికి వెన్నుదన్నుగా ఉన్న డా.రామారావుగారి క్లినిక్ పై దాడి చేసి, రోగులను తరిమి వేసారు. సమీప గ్రామాలపై పడి ప్రజలను చితకబాదుతున్నారు.

ఇదంతా చూస్తుంటే మళ్ళీ శ్రీకాకుళం మొదలయ్యే క్రమానికి ప్రభుత్వమే ప్రజలను తోస్తుందనిపిస్తుంది. ఏమీ తెలీనట్లు మాట్లాడుతున్న ముఖ్యమంత్రిగారు, పోలీసులను వెనకేసుకొస్తున్న హోంమంత్రిగారి మాటలు తీవ్ర వేదనకు లోనైన ప్రజలకు పుండుమీద కారం చల్లినట్లుగా వున్నాయి.

వేల ఎకరాల పంట భూములను, తీర ప్రాంతాన్ని నాశనం చేసే థర్మల్ ప్లాంట్ల వలన ఎవరికి ఉపయోగం? అక్కడ ఉత్తత్తైన విద్యుత్ లో ఒక్క యూనిట్ కూడా ప్రభుత్వానికి చెందదు. మరి వారికి ఇంత చౌకగా భూములను కట్టబెట్టి, అనుమతులే లేని వారికి వత్తాసుగా నిలబడి ప్రజల ప్రాణాలను హరించే వీరిని ఏమనాలి?

మనం గుర్తుంచుకోవాల్సిన విషయం ఒక్కటే ఉద్దానం ఒట్టి బీల ప్రాంతమే కాదు ఉద్యామాల వనం..

అల్లూరి వారసులేనా?


అల్లూరి ఈ పేరు వింటేనే రోమాలు నిక్కబొడుచుకుంటాయి. నరాలలో లావా ప్రవహిస్తుంది. అన్యాయం పట్ల తీవ్రమైన ఆగ్రహం కలుగుతుంది. తను పూరించిన విప్లవ శంఖారావం చెవులలో గింగుర్లెత్తుతుంది. తను పంపిన మిరపకాయ టపా ఘాటు నేటికీ పరిమళిస్తుంది. తను ఎత్తిపట్టిన విల్లు నాటి గాండీరావాన్ని తలపిస్తుంది. తన రూపమే ఒక ఉత్తేజం. నేటికీ తెలుగు వారి మదిలో ఓ గొప్ప ధీరోదాత్తత కలిగిన విప్లవ యోధుడిగా చిరస్మరణీయుడయిన విప్లవ తేజం, స్ఫూర్తి. ఆయన మార్గంలో లక్షలాది మంది గిరిజనులు నేటికీ పోరాట మార్గంలో వున్నారు. తమ ఉనికికి ముప్పు తెస్తున్న రాజ్యానికి వ్యతిరేకంగా నిజమైన అవతార్ పోరాటాన్ని చేస్తున్నారు. 

అలాంటిది నిన్న ఆయన 86 వ వర్థంతి సందర్భంగా బూరుగుపూడిలో జరిగిన కార్యక్రమంలో ఆయన సోదరుల కుమారులు, కుమార్తెలు, ఇతర కుటుంబ సభ్యులు తమకు ఆయన వారసులుగా ప్రభుత్వం ఆదరించడం లేదని వాపోవడం సిగ్గుచేటు. వై.ఎస్.ఇస్తామన్న లక్ష రూపాయల విరాళం అందలేదని ఆవేదన వ్యక్తం చేయడం ఆయనను అవమానించడమే. ఆయన పోరాట స్ఫూర్తికి పూర్తిగా విరుద్ధం. ఆయనకు వారసులమని చెప్పుకొని, ప్రభుత్వాన్ని వేడుకోవడం భావ్యంకాదు. సామాన్యుని నడ్డివిరుస్తూ, ఏ ఆదివాసీ తెగల స్వయంపాలన కోసమైతే సీతారామరాజు పోరాడారో ఆ ఆదివాసీ ప్రజలపై తీవ్రమైన దాడులు చేస్తూ, అత్యాచారాలు చేస్తూ, సహజ సంపదను హరిస్తూ, వారిని నిర్వాసితులను చేస్తూ, సాంస్కృతికంగా అణచివేస్తూ మొత్తంగా వారిని వారి భూభాగం నుండి తరిమే కార్యక్రమాన్ని అమలు చేస్తున్న రాజ్యం మోచేతి నీళ్ళకు ఆశ పడటం ఆత్మహత్యాసదృశ్యం.

యిది ముమ్మాటికి ఆయన పోరాట  వారసత్వానికి అవమానం.

ఎవరు భర్త – ఎవరు భార్య


తెలంగాణా ఉద్యమాన్ని నీరుగార్చేందుకు ఏర్పడిన శ్రీక్రిష్ణ కమిటే చైర్మన్ జస్టిస్ శ్రీక్రిష్ణ తెలంగాణా ఆంధ్రా ప్రాంతాలను భార్యా భర్తల సంబంధంతో పోలుస్తూ వ్యాఖ్యానించారు. అయితే ఇందులో ఎవరు భర్త స్తానంలో వున్నారు, ఎవరు భార్య స్తానంలో వున్నారు. నిజానికి సామాన్యంగ వేధింపుల భర్త నుండి భార్యే విడాకులు కోరుతుంది కాబట్టి తెలంగాణా ప్రాంతానిదే భార్య స్తానం అనుకుంటా.

తన ఈ వ్యాఖ్యానంతో మనకు అర్థమయ్యేది ఈ కమిటీ తెలంగాణా ఏర్పాటు ప్రక్రియ కోసం కాదు యిరువర్గాల మధ్య సయోధ్య కోసం ఓ కౌన్సిలింగ్ డాక్టర్ మాదిరి పనిచేసే కార్యక్రమం మాత్రమే. యింతమంది ఆత్మ బలిదానాలతో తెలంగాణా ఆత్మ క్షోభిస్తుంటే ఈ నాన్చుడు కమిటేలతో ఒరిగేదేమీ లేదు. రాజకీయనాయకుల నంగనాచి కబుర్లను నమ్మి యువత మోసపోరాదు. వాళ్ళ వాళ్ళ వ్యాపార లావాదేవీలను కాపాడుకునేందుకు ఎవరితోనైనా కయ్యమాడగలరు, వియ్యమందగలరు. కనుక ప్రజలే దీనికి పరిష్కారమార్గం వెదుక్కోవాలి.

ఆత్మ బలిదానాలన్నీ రాజకీయ హత్యలే!


నిన్న ఓయూ విద్యార్థుల  అసెంబ్లీ ముట్టడి కార్యక్రమం సందర్భంగా ఆ ఉద్వఘ్న క్షణాలలో యాదయ్య తనకు తాను కిరోసిన్ పోసుకు నిప్పంటించుకొని తన చివరి ఊపిరి వరకు జై తెలంగాణా అని నినదించడం చూసైనా రాజకీయ పక్షాలులొ చలనం కలగలేదంటే, యిదంతా పథకం ప్రకారం వారి వారి వ్యాపారాలకు అనుకూలంగా ఉద్యమాలను మలచుకోవడంగా కనిపిస్తోంది. వరంగలె లో సవేరా టీవీలో జరుగుతున్నది చూస్తూ తట్టుకోలేక తాను కిరోసిన్ పోసుకు కాల్చుకుంది.

తెరాస వాడు ఎక్కడా ఒక్కడూ  కనబడలే. ఏబేరాల రాయబారాలలో కులుకుతున్నారో?

కాంగ్రెస్ వాడు ఆలూ లేదూ చూలూ లేదు కొడుకు పేరు సోమలింగమన్నట్లు సి.ఎం. నేనంటే నేనని  ప్రకటించుకొంటు, స్వార్థ ప్రయత్నాలు మొదలెట్టారు.

తెదెపా వాళ్ళు కళ్ళు చిదంబరం (ఇది సింబాలిక్ గా మాత్రమే, మరోలా అనుకోవద్దు) కళ్ళులా అటొకటి, ఇటొకటి చూపుతున్నారు.

మొదటి అంకంనుండే తీవ్ర మీమాంస కలిగిన ప్రరాపా వారు ఊయలెటు ఊగితే ఆ చివర నాది అని ఊగుతున్నారు.

కొంగకు పళ్ళెంలో పెట్టిన పాయసంలా వుంది బిజెపి వాళ్ళ పరిస్థితి.

మజ్లిస్ వారిది ఎవరైతే నాకెంటి మా పాతబస్తీలో మాదే కదా మజిల్ పవర్, దేశం ఏ గుడ్డు కరిస్తే నాకేంటని కాచుక్కూచున్నారు.

యిలా రాజకీయ పార్టీలు ఎవరికి వారు వుంటే ప్రజలు మాత్రం తమకేమీ పట్టనట్లు తమ జీవితపు నౌకను ఎటు గాలివీస్తే అటు తెరచాపతో పాటు తెరల ముందు లాగించేస్తున్నారు.

నేటివరకు సుమారు 300ల మంది పైగా ఆత్మ బలిదానాలు చేసుకున్నారు. ఇవన్నీ ఓట్టిపోవల్సిందేనా?

వారు కన్న  కలలను వారి కనురెప్పల మాటున బూడిద గావడమేనా?

ఈ రాజకీయ రాబందుల గళ్ళాను ప్రజలెప్పుడు పట్టుకు నిలదీస్తారో?

ప్రస్తుతం యిదంతా రాజకీయ వ్యవస్థ వైఫల్యమే. ఈ కారణంగానే అణచివేత విధానాన్ని అవలంచిస్తోంది. కౄర నిర్బంధాన్ని ప్రయోగిస్తోంది. అది చూసి విద్యార్హ్తి, యువజనులు తాము మోసపోతున్నామనే భావనలో ఆత్మ బలిదానాలు చేసుకుంటున్నారు. కావున యివి రాజకీయ హత్యలే.